談西環

一眨眼，就係西環呢區住左年幾。

之前好少到西環，試過睇樓、同埋去士美非路泳池游水，係咁多。

但住落左之後，又發覺好唔同，完成唔係心目中好多老人家既舊區。

先講食方面，除左大眾化既大X樂、大X活、麥當X之外，重有好多選擇，一條厚和街已經要一個禮拜先試得晒，泰菜如泰尚泰國菜館、泰國人海南雞; 日菜如嵐川日本串燒; 廣東小炒如張仔美食館等等;行過去科士街同加多近街又有意大利菜同埋越南菜，d美食多到呢~~~^o^

住方面亦都唔差，因為家有露台同埋向東南，真係可以話係冬暖夏涼，呢幾日酷熱天氣警告之下，夜晚都可以唔開冷氣瞓；另外，唔計會所既設施，附近又有乜都齊既士美非路街市、圖書館、泳池、室內體育館等等，行過去都係只需5分鐘，方便到極，而且又唔會好似太古城、沙田咁，一放假就好多人，人都唔會咁易燥。

至於行方面就更好，巴士唔駛講喇，想慢d就可以用兩銀野坐“叮叮”由西環去到港島東，坐到你Pat Pat痛都重得；想快既又有紅頂小巴，去銅鑼灣又得，行西隧去旺角又得；最後就梗係係2012年有埋MTR喇，fit晒~~~

講左咁多野，好似sell人租/買西環樓咁，查實係我地將會搬離呢個咁方便既名校區，有少少唔捨得，有感而發啫，不過講開又講，係域多利道頭荒廢左好耐既垃圾焚化爐同埋屠場，咁啱會係未來一兩個月清拆，附近環境多多少少一定有d影響，香港空氣已經唔好架喇，希望對附近既住戶既影響減到最少喇。

一切有祂安排，話唔埋幾年後又搬番黎中西區呢~~~