無言感激

不經不覺，明日27號就會上機去峇里，我地部份家人、親戚、朋友、同事們會一齊見證我地既婚禮；而有好多因事唔能夠去既朋友就好有心，送左好多結婚同埋入伙禮物入俾我地 (見相)，真係太客氣喇，上黎加雙筷或者飲下紅酒咪得囉。
在此再三謝過各位兄台既厚愛，無言感激，等我地返香港之後再約出黎睇片食飯喇~~~ciao

德國旅行車

服役左四年幾五年既法國靈獅彎路皇最近退役喇。當初為左一嘗揸棍波車既感覺，買左佢，點知一揸揸左五年，真係堅! 雖然佢係一部好車，但係為左令煎魚有得領略下駕駛既快感(辛苦)，都係時間換下車喇~~~

Home Sweet Home

經過兩個月既裝修工程，我地已經係9月正式入住我地既家喇! 翻新左間屋真係唔同晒，一切都好企理，月尾送埋張電腦枱同埋速電腦就大功告成，朋友們可以黎House Warming喇~~~

讚賞和感謝

在此真的要讚一下我老公, 在最近的一連串的繁事, 包括裝修, 搬家, 巴里結婚, 北京擺酒等等, 可以說他一手包辦, 搞得頭頭是道, 我也順勢做個小婦人, 只專注公司的事.

有時人真要經過事情的考驗, 才現出真本事, 真性情, 我感謝主給了我一個有擔當, 有責任感, 有愛心, 有胸襟, 有熱誠, 有毅力, 越發成熟的好男人.

交屋一肚氣 之 貪得無厭

香港地點解貧者越貧，富者越富，完全可以係我交樓既事件中深深體會。

話說我地係西環租既屋要係31號交樓，跟住攞番兩個月Pre-paid。

之前都預左個老女業主麻煩，早前已經裝番d燈，又掃左地，執過d地方咁，免得佢有借口扣起d Pre-paid。

到左個曰，業主先係遲左半粒鐘，都算喇。黎到又話呢度話清潔，個度唔乾淨，亦都係預左，心諗住左年幾，間屋有人同冇人住都一定好大塵架喇，唔好玩喇，所以我都控制住我既EQ，佢有佢講，我就左耳入右耳出，唔通我搵清潔公司同你執一次咩。

跟住試電器就最順利；到左試房鎖匙，我企左入房鎖左度門，佢左擰右擰都開唔到，連開門都唔識，重要話條鎖匙唔啱，原來佢除左EQ有問題，IQ都有d問題。

最後高潮來臨，業主話點解d燈得個燈胆，唔算係“燈飾”，就開始左呢場正常人同癲婆既理論。
佢就攞住份合約係手話開始個時HK$1500包全屋窗簾同埋“燈飾”，依架d窗簾ok，但係就話d要“燈飾”唔係要燈胆，係要話佢要裝佢裝開個款。我就話[ 阿T太，個陣時講好話我地會用HK1500裝窗簾，跟住自己出錢裝d好d既燈，走個陣時攞番，我都好有手尾咁裝番d燈胆俾佢架喇 ]；跟住佢就好似師傅到咁，燥狂抑鬱乜都黎晒，又話我唔理之前裝d乜野燈，依架呢d唔係“燈飾”，係“燈胆”，我就即時同佢講，[ 得，你要“燈飾”，我即係落去買幾個燈罩，咁咪叫“燈飾”囉 ]，佢又唔肯，話要佢之前裝開個隻；如此這般爭論左半粒鐘，跟住就落左去佢能夠用HK$1500做晒全屋窗簾同埋“燈飾”個間舖打下價，我打死都唔信HK$1500可以做晒全屋窗簾同埋燈飾。

落到去，原來都係我地搵開個間，業主同老闆娘W小姐講，[ 你個時幫我攪間屋d窗簾同埋燈飾，1500蚊攪掂，你記唔記得呀? ]。老闆娘W小姐話唔係好記得播，係都好多年前喇。完全唔知米貴既業主就死都要話做到，跟住打完價，全屋用佢裝開個隻燈飾，連工包料要HK$1170，我望住老闆娘W小姐笑左一笑，跟住即刻話，[ 即係剩番HK$330裝晒全屋窗簾 ? 好，不如咁，你係度搵隻布，可以用HK$1500做晒全屋窗簾同埋燈飾，我即刻上樓拆晒d窗簾，再俾返HK1500你，堅既!!! ]業主就梗係答唔到我喇，我算你d布唔駛錢，人工$330點都做唔到喇。

作為中間人既經紀P就同我出舖頭傾，由最初要我出晒HK$600，到最後我同經紀P一人HK$200了事。因為已經傾左成個幾兩個鐘，我又要返新居執屋，加上同業主傾等如係街邊同個智瘴或者痴綫既人傾計，傾到一肚氣，重要俾佢扣住d Pre-paid，個兩百蚊衰d講句俾多一蚊佢當帛金又好，當買番d燈罩又好，費事同d人一般見識，件事就係咁完結。

有d前輩話發財會立品，好明顯都有例外既；呢個業主手上都肯定有幾個四球野既樓盤放租，屋企唔係住山頂，就係住南區，但係呢d都唔係個人身家既問題，佢睇錢睇到咁大，重要貪得無厭，係其他方面一定會地方佢會控制唔到，亦可以無得佢控制。

係香港地，做我地呢d‘夾心人’有時都真係幾苦，對自己，對人地有要求，但係又唔學得d有錢人咁惟我獨尊；又唔學得d呃綜緩人咁耍無賴。不過諗深一層今生好快過姐，將來永生受苦就大件事喇!!!

好消息一籮籮

好朋友W正值轉工之際，突然收到我公司人事部電話話有offer。最特別就係我地係好友，亦做過同學，做過鄰居，就快重做埋同事，我諗唔會有咁多人有咁既緣份掛……

好友J最近換左隻好似變形金鋼既大玩具，攪到我都心郁郁……

自己份工一眨眼就做左五年，收左封信，有d Advancement，責任大左，努力努力……

煎魚出年年頭都開始Acting，要handle既case會難左，但係要進步一定要踏出自己既comfort zone，慢慢就處理到……

裝修工程都好準時，無出亂子，跟住順利裝埋電器，攪完衛生，Pack箱搬野，執野，攪掂晒，好友們可以黎House warming。